Härztod

Schön, sendsi weder do. Mer schliessid grad a dere Verletzlechkäit vo letscht Wochen aa ond redid hött öber Ehrlechkäit. Dasch au essenziell, wenns om Liebeserchlärige got. Ond wemme weder de Bleck zode Profis wot wärfe, de füehrt jo äigentlech ke Wäg a Scharlachrot verbii. Dasch e jongen Evergriin, dasch ergendwie schwiizerischs Kulturguet, do ghört me grad d Melodii em Chopf, wenn öpper säit:

E brönne mer di Name zmettst i mis Härz.

Dasch scho mol e schpannendi Variazion vo dem Härzschmärz vo letschtmol: Liebi as Brandmal, Liebi as Kwal, Liebi as ewige Tröieschwur. Dasch scho mol ned schlächt. Was die Liebeserchlärig aber de rechtig guet macht, esch natürlech das, wo nochär chonnt:

Chönnt schwöre, dasi ewig blibe,
Wenn üs nüt drzwösche chonnt.

Dasch de nömme nome plompe Masochesmos. Klar esch do e gwössi Onderwörfikäit debii ond au de obligati Tröieschwur. Aber ebe relativiert: Die Liebeserchlärig lot d Opzion offe, dass öppis dezwösche chonnt. Ond denn au no em em Konjunktiv. Dasch jo ned gschwore, do esch nome d Opzion ome, das z schwöre. Ond das mosme zersch mol schaffe: Sone Tröieschwur em Konjunktiv, wo gliich ufrechtig tönt. Trotz doppleter Relativierig, trotz dene bede Notusgäng.

Dasch e Liebeserchlärig osem rechtige Läbe, wel dört chont jo no hüüfiger öppis dezwösche, asmen em erschte Momänt mängisch mäint. Dasch jo au banal: Ech glaub, di allermäischte vo Ehne hend jo meh Lüüt, wosi nöm metne zäme send as Lüüt, wosi metne zäme send. Ebe. Drom esch das nomen ehrlech.

Ond rechtig klar werd das jo, wemme mol es Gägebiischpel nemmt. E populäri Liebeserchlärig vom Adrian Schtärn got jo zom Biischpel so:

Mis Herz schlat nume no für dich,

Ich hoffe du gschpürschs und dänksch a mich,

Mis Herz isch bi dir jede Tag,

Bis a de Tag wo's nümme schlat,

Dasch scho e schtäili Aasag ede höttige Ziit, oder? Liebi bes zom Härztod. Realestisch esch das läider ned. Ond das schprecht jo au ned gäge d Liebi oder gäg di höttigi Ziit. Das schprecht meg gäge so Lüt wi de Adrian Schtärn, wo emmer chli meh verschprächid, as si chönd iilöse. Lömmer das mol as Biischpel lo schto. Ond nämemer met: Ehrlechkäit esch alles, wenns om Liebeserchlärige got. Wennsi das verschtande hend, hendsi scho huere vell verschtande.

Dieser Artikel wurde im Rahmen im Rahmen des «Innereien»-Kulturprojektes der Albert Koechlin Stiftung produziert. Hier erfährst du mehr darüber. Und hier geht es zur offiziellen Webseite: www.innereien.ch.