Härzschmärz

Di mäischte Lüüt verschwändid jo Onsommen ond Onmängen a Ziit ad Liebi: Die chaufid Parfüm ond Chäre, Bluemen ond Markechläider, bruuchid Insta-Felter ond Schönhäitsoperazione, ond inveschtierid en akademischi Tetel, schpannendi Hobis ond e beiidrockende Bizeps. Ond vell vo dene Sachen fonkzionierid e gwössne Situazione för gwössi Mönsche jo au. Aber semmer ehrlech: Das gäbs au düütlech gönschtiger: Liebi.

Met de rechtige Liebeserchlärig zom rechtige Ziitponkt zom Biischpel chame das jo alles iisi kompensiere: Schönsii, Riichsii, Gschiidsii ond dä ganzi Schäiss. Ond gliich brengid die mäischte Lüüt nüt öberd Leppen as ab ond zue es plomps «ech liebe dech», wel si das mol emene Holiwudfelm gseh hend. Ond met «die mäischte Lüüt» mäinemer natürlech primär die mäischte Männer. Klar: Pauschalisieren esch emmer schwerig, aber wenns oms Kommuniziere vo Emozione got, de schtemmt das halt, dasch mettlerwiilen au wösseschaftlech nochegwese.

Mer luegid drom höt nomol es Praxisbiischpel vo professionelle männleche Liebeserchlärer aa. De chönd Si, liebs männlechs Publikom, ersch gar ned met so belligen Usrede cho, wi dass das ergendwie gschlächterabhängig oder hormonell definiert esch, dasme ned cha öber Liebi rede. Ond mer nämid ned ergendwelchi schnolzige Softis. Mer luegid grad äxtra i Hiphop.

Dasch jo zersch mol kontraintuitiv. Dass Hiphoper guet chönntid öber Gfühl rede oder bsonders gueti Liebeserchlärige chönntid mache. Dasch mäischtens z sälbschtbewosst, s grosschotzig, z ufblose, dä Räp. Ond os deren Öberlägehäitshaltig usen e Liebeserchlärig mache, das fonkzioniert sälte. Dasch jo öppis, wo di mäischte Männer wi di mäischte Hiphoper ned tscheggid: Me mos emmer au zäige, dasses äim om öppis got. E gueti Liebeserchlärig het emmer au met Verletzlechkäit z tue. Me mos förne gueti Liebeserchlärig de Härzschmärz zuelo ond uselo.

«De erscht, wo Härz of Schmärz gräimt het, esch es Schenii gsi, de honderttuusigschti e huere Pfiife.» Das het ergend e tütsche Schreftschteller mol so senngemäss gsäit. Ond das schtemmt natürlech. Gliichziitig fonkzioniert das halt scho emmer no guet, das Schmärz-Thema, dä Topos vom Härzschmärz. Chömemer drom zom Praxisbiischpel: Luegemer mol Couk Sirou vo GäilerAsDu aa. Das fot nome scho aa met:

Ech hane riise Ress ide Broscht,

Mis Härz schpockt Füürbäll id Loft.

Das setzt scho mol de Ton. Dasch grosse Schmärz, dasch pathetisch, das tod wörklech weh. Mer hend do e Song öbernes Härz, wo wörk am Arsch esch, mer hend do e maximal verletzlechi Liebeserchlärig:

Üse Ruef esch nüd me wärt,

Mer hend Chotze ofem Shirt,

Wuet e üsne Härz.

Dasch glaub d Botschaft för höt: Wenn das sogar Räpper chönd, de chönd Si das au: Sech verletzlech machen ond säge, wenn öppis wehtuet. Au enere Liebeserchlärig. Liebi tued mängisch weh, de dafme das au säge. Wenn Sis denn au no so schön sägid wi GäilerAsDu, hend Si alles rechti gmacht:

Denn bes öppen em Auguscht

Dezämber ede Broscht.

Dasch e rechtig gueti schwiizertütschi Liebeserchlärig. Dass die Verletzlechkäit de gliich no relativiert werd, velecht met dere Bloudschob-Huuk fasch chli öberkompensiert werd, dasch gschänkt. Wel s esch jo emmer no Hiphop. Aber hey: Dä Omgang met dem uralte HärzschmärzThema, dä esch guet. A dem chönd Si sech es Vorbeld nä.

Dieser Artikel wurde im Rahmen im Rahmen des «Innereien»-Kulturprojektes der Albert Koechlin Stiftung produziert. Hier erfährst du mehr darüber. Und hier geht es zur offiziellen Webseite: www.innereien.ch.